MATUR ÚR HÉRAÐI - LOCAL FOOD

Sýningin MATUR-INN 2009 verður haldin í Íþróttahöllinni á Akureyri dagana 3. og 4. október næstkomandi. Sýningin er stærsti viðburður í starfsemi félagins Matur úr Eyjafirði - Local food en síðasta sýning var haldin haustið 2007 í Verkmenntaskólanum á Akureyri og var fjölsótt. Sýninguna sóttu þá um 10 þúsund manns og fullljóst strax að henni lokinni að færa yrði sýningarhaldið í annað húsnæði. Því varð Íþróttahöllin nú fyrir valinu og verður henni sannarlega breytt matarhöll og uppskeruhús þessa fyrstu helgi októbermánaðar

Viðburður sem draga mun að sér þúsundir gesta
Líkt og áður er lagt upp úr því að sýningin verði í senn fjölbreytt og hápunktur í norðlenskri matarmenningu. Í boði verða sýningarsvæði fyrir fyrirtæki og félagasamtök, markaðssvæði verður einnig þar sem kjörið er að selja haustuppskeruna eða hvað annað sem tengist mat og matarmenningu. Á sýningarsvæðinu verða einnig skemmtilegar keppnir sem gestir geta fylgst með og loks verður haldið málþing um íslenskan mat í tengslum við sýninguna. Í senn verður því um að ræða fróðleik og skemmtun sem vafalítið mun draga að sér þúsundir gesta. Aðgangur að sýningunni verður ókeypis.

Lögð er áhersla á að sem flest fyrirtæki sem tengjast matarmenningu taki þátt og er markmið aðstandenda sýningarinnar að halda áfram þar sem frá var horfið á vel lukkaðri sýningu 2007, sýna og sanna hversu stórt hlutverk matvælin leika á Norðurlandi, allt frá framleiðslu og vinnslu til mat- og framreiðslu.

Mikilvægt að skrá þátttöku sem fyrst
Eins og áður segir  verður sýningin á laugardegi og sunnudegi, 3. og 4. október. Sýningin verður opin báða dagana kl. 11-17.

Sýningarkerfi verður uppsett og gólf teppalagt. Fermetraverð í básum er 8.500 kr. fyrir félaga í Mat úr héraði og 12.500 fyrir aðra. Innifalið í því er sýningarkerfi og lýsing. Hægt verður að leigja aukahluti frá leigjanda sýningarkerfis, sem og aukatengingu á rafmagni. Hægt verður einnig að kaupa aðgang að nettengingu á sýningarsvæðinu.

Á markaðstorgi verður aðstaða við söluborð en að öðru leyti sjá aðilar sjálfir um sína aðstöðu. Gjald fyrir aðila er 10.000 fyrir alla helgina. Undirstrikað er að aðilar á markaðnum þurfa að uppfylla öll skilyrði sem heilbrigðiseftirlit gerir til sölu af þessu tagi.

Sýningarstjórn skipa Friðrik V. Karlsson og Ingvar Gíslason, stjórnarmenn í félaginu Mat úr Eyjafirði. Auk þeirra Jóhann Ólafur Halldórsson hjá Athygli sem tekur á móti skráningum og veitir upplýsingar sem sýningarhaldið varðar.

Skráningar fyrir þátttöku í sýningunni þurfa að berast á tölvupósti á netfangið johann@athygli. is fyrir miðvikudaginn 16. september með óskum um áætlað rými. Símar hjá Jóhanni Ólafi eru 899-9865 / 515-5220.