MATUR ÚR HÉRAÐI - LOCAL FOOD

Um liðna helgi tók félagið þátt í Vetrarhátíð í Reykjavík í samstarfi við Þingeyska matarbúrið, Matarkistuna Skagafjörð og norðlenska ferðaþjónustuaðila undir merkjum Markaðsskrifstofu ferðamála á Norðurlandi. Ástæða þessa verkefnis er sú að Norðurland var að þessu sinni gestalandshluti á Vetrarhátíð og var þetta í annað skipti sem slíkt er gert. Yfirskriftin var Skíði, menning, matur og var þátttaka svæðismatarfélaganna svo sannarlega mikilsverð tenging í þessu samhengi.

Kynningin fór fram í Höfuðborgarstofu. Þar voru matarfélögin þrjú með sameiginlegan bás þar sem ýmsir gómsætir norðlenskir réttir voru í boði fyrir gesti og gangandi. Ferðaþjónustuaðilar buðu sérstaklega til sín starfsfólki ferðaskrifstofa á höfuðborgarsvæðinu á föstudeginum og á þeirri kynningu var norðlenskur matur ein grunnstoðin. Húsið var hins vegar opið almenningi bæði á föstudag og laugardag og samkvæmt nákvæmri rafrænni talningu litu um 7000 manns inn þessa tvo daga.
Óhætt er að segja að Norðurland hafi sett mark sitt á miðborgina því rauðum hjörtum var dreift víða, bæði í glugga og í barm miðborgargesta. Úti fyrir Höfuðborgarstofu voru íshjörtu skorin út í norðlenskan ís en listamaður í því verki var Hallgrímur Sigurðsson, yfirmatreiðsumaður hjá Friðriki V. Í matarbásnum var meðal annars boðið upp á rækjur, rúbrauð, sauðakjöt, þurrkað ærkjör, skyrdrykk, hrossakjöt, osta, reykta síld, kæfur, slátur og þannig mætti áfram telja. Kynningarefni um norðlenska matarmenningu og matarfélögin lá frammi.
Þessu öllu til viðbótar var fiskisúpa í boði hjá þeim Friðriki V. Karlssyni, matreiðslumanni, Júlíusi Júlíussyni, mataráhugamanni og Finnboga Marinóssyni, ljósmyndara, en þeir félagar kynntu bók sína Meistarinn og áhugamaðurinn sem út kom í haust. Þar leiða þeir Friðrik og Júlíus saman hesta sína í matreiðslu á fiski en ljósmyndaþátturinn var í höndum Finnboga.

Óhætt er að segja að allir sem að Vetrarhátíðarverkefninu komu hafi verið ánægðir og sérstaklega mikilsvert að allir hagsmunaaðilar á svæðinu í matarmenningu og ferðaþjónustu vinni saman með þessum hætti. 

 Hér að neðan má sjá nokkrar myndir frá kynningunni: 

Gestirnir luku lofsorði á norðlenskan mat - enda full ástæða til.

 

Jóhann Ólafur, verkefnisstjóri Matar úr Eyjafirði, í skrúðanum. Ólafur Jónsson, matreiðslumaður á Hólum í Hjaltadal útbýr krásirnar. 

Friðrik V. Karlsson í ísbjarnarklóm!

 
Ferðaþjónustuaðilar bera saman bækur sínar og ræða við gesti.

 
Örtröð við básana. Hjörtun voru áberandi og brosið ekki síður á viðstöddum.

Matarlegt er það!

Gestur við bás þeirra Friðriks V, Júlíusar og Finnboga hefur eflaust hælt súpunni og bók þeirra félaga, enda ástæða til. 

Íslistamaðurinn Hallgrímur Sigurðsson, yfirmatreiðslumaður hjá Friðriki V vakti mikla athygli úti fyrir höfuðsborgarstofu. Ekki á hverjum degi sem traujárn eru notuð utanhúss! Friðrik Valur fylgist með. 

Friðrik Valur ræðir um norðlenska drykki og matargerð við boðsgesti á kynningunni á föstudag. Hér er skyrdrykkur frá MS á borðum, þrjár tegundir af Kalda frá Bruggsmiðjunni og að sjálfsögðu kók í gleri, sem fylgt hefur gosdrykkjaframleiðslunni á Akureyri mjög lengi. 

Jóna Matthíasdótti, verkefnisstjóri, hjá Þingeyska matarbúrinu, fyllir á borðið. 

Guðrún Brynleifsdóttir, verkefnisstjóri Matarkistunnar Skagafjarðar, ræðir við gesti.